Fimmtudagur

FRÉTTIR OG FRÓÐLEIKSMOLAR UM MARKAÐSMÁL OG AUGLÝSINGAR
FRÉTTIR OG FRÓÐLEIKSMOLAR UM MARKAÐSMÁL
OG AUGLÝSINGAR
#125
4/3/2021
Samfélagsleg ábyrgð
Dekur og áhyggjuleysi Toyota
Lægsta verð ÓB
Sacla – ósvikið ítalskt bragð
WAITR í samstarf við Pipar\Engine
Samfélagsleg ábyrgð

Eflaust hafa einhverjir tekið eftir því að fyrirtæki láta í auknum mæli til sín taka í samfélagstengdum málum. Nokkur ofur-vel þekkt dæmi er Nike og tengsl þess við Colin Kaepernick og Patagonia og barátta þess við Donald Trump forseta um verndun þjóðgarða í Bandaríkjunum (sem Trump lokaði og leyfði þar olíu-, gas- eða námavinnslu). Bara tvö dæmi af fjölmörgum sem hægt væri að taka. En hvers vegna skyldu þessi fyrirtæki vera að taka þessa afstöðu, sem í flestum tilvikum er rammpólitísk og flest fyrirtæki hafa forðast sem heitan eldinn síðustu áratugi? Ástæðan er kannski þessi litla setning – Doing good is good for business. Fyrirtæki sjá sér raunverulegan hag í því að taka afstöðu í hinum ýmsu málum, sem þau hefðu aldrei gert fyrir nokkrum árum síðan.
Viðskiptavinir þessara fyrirtækja eru nefnilega farnir að krefjast þess að fyrirtækin geri eitthvað fyrir umhverfið eða samfélagið, annars fari þeir með viðskipti sín og velvild annað. Til dæmis segjast 75% af neytendum í Bandaríkjunum vera reiðubúnir að hefja viðskipti við fyrirtæki sem styður málefni sem þeim er kært og 66% segjast tilbúin að greiða meira fyrir vöru frá fyrirtæki sem styður mikilvæg samfélagsmál (Clutch, janúar 2019).

Forstjóri Deloitte ráðgjafarfyrirtækisins dró þetta vel saman – „We firmly believe that companies motivated by a greater societal purpose will be stronger, more successful businesses for the long term.“ En hvernig standa íslensk fyrirtæki sig hvað varðar samfélagslega ábyrgð? Hafa þau tekið jafn skýra afstöðu og dæmi eru um erlendis? Vissulega styðja íslensk fyrirtæki íþróttastarf í stórum stíl. Íslandsbanki kemur upp í hugann fyrir jafnréttismál, allar umbúðir hjá Te & Kaffi eru orðnar niðurbrjótanlegar og stefnt er á að orkugjafinn í brennslunni verði íslenskt metan. Olís hefur stutt við skógrækt árum saman, BM Vallá stefnir á kolefnishlutleysi og auðvitað eru fjölmörg fyrirtæki til fyrirmyndar í sorpflokkun, en svo fjarar þessi listi fljótt út. Það er deginum ljósara að hér liggja fjölmörg tækifæri fyrir íslensk fyrirtæki til að sýna viðskiptavinum sínum að þau skilji þessa nýju kröfu og hugsi til lengri tíma um leið? Það skilar þeim bæði velvild, viðskiptum – og betri jörð.

Dekur og áhyggjuleysi Toyota

Með öllum nýjum bílum frá Toyota á Íslandi fylgir 3 ára þjónusta og 7 ára ábyrgð. Þessu vildum við koma til skila á einfaldan og skiljanlegan hátt og sáum þann kost vænstan að nota kettling í myndmálið.

Umstang í kringum fjölskyldubílinn er víst eitthvað sem veitir fáum sérstaka gleði og að þurfa að borga fyrir það að auki er heldur ekki til bóta. Nálgunin er því einföld: áhyggjuleysi, tíma- og peningasparnaður, þægindi og góð tengsl við viðskiptavininn.

Já, og auðvitað fallegur kettlingur.

Lægsta verð ÓB

ÓB bensín býður sitt lægsta eldsneytisverð án allra skilyrða á fjórum stöðvum. Til að vekja athygli á því var m.a. ráðist í gerð nýrra sjónvarpsauglýsinga þar sem guli broskallinn, einkennistákn ÓB-stöðvanna, hittir fyrir ýmsar litríkar og mishressar fígúrur. Í leiðinni var ÓB-hausinn uppfærður og einfaldaður í útliti og þannig færður nær kollegum sínum úr heimi tjáknanna, eða „emojis“.

Sacla – ósvikið ítalskt bragð

Eldhúsið er hjarta heimilisins og með ítölsku Sacla-vörurnar við höndina er auðvelt að framreiða lúffenga rétti. Það lá beint við að fá óperusöngvarann Gissur Pál og fjölskyldu, sem bjó á Ítalíu um árabil, til að sýna okkur hinum hvað það er einfalt og fljótlegt að framreiða ekta ítalska rétti við allra hæfi með fjölskyldunni. Framleidd var röð sjónvarpsauglýsinga og upp úr þeim einnig efni fyrir samfélagsmiðla, strætóskýli o.fl. Allt efnið var unnið og framleitt á Pipar\TBWA. Hljóðvinnsla var í höndum Bigga Tryggva og Aldís Páls var með linsuna á lofti.

WAITR í samstarf við Pipar\Engine

Nýverið leitaði tæknifyrirtækið WAITR í Bandaríkjunum til okkar um samstarf. WAITR telst vera allstórt á ameríska vísu og hefur með höndum dreifingu á mat frá veitingahúsum. Fyrirtækið vildi fá samstarfsaðila varðandi rekstur Google-auglýsinga, Bing-auglýsinga og Apple-auglýsinga. WAITR, sem er með starfsemi í um 700 borgum í Bandaríkjunum, opnar að meðaltali um þrjú ný þjónustusvæði í hverri viku, þannig að starfsemin verður sífellt umfangsmeiri. Samningur þessi markar stór tímamót fyrir Pipar\Engine þar sem auglýsingafé (Ad Spend) er í allt öðrum tölum en þekkist hérlendis. Pipar\Engine var í samkeppni við fleiri stafrænar stofur í Bandaríkjunum um þessi viðskipti en WAITR var áður hjá Range Digital í Minneapolis.

Hvers vegna er fimmtudagur besti dagur vikunnar?
Hann er þægilega nálægur helginni og nógu fjarlægur mánudegi.
FIMMTUDAGUR er sendur til viðskiptavina og vina Pipars\TBWA.
Ég vil gerast áskrifandi að Fimmtudegi
Fimmtudagur kemur alla jafna út fyrsta fimmtudag í mánuði
Takk fyrir að gerast áskrifandi að Fimmtudegi
Því miður kom upp villa. Vinsamlegast reyndu aftur síðar.